Guftûgoyên derbarê sazkirina hukûmeta nû ya Rûsyayê destpê kirin

    Serokkomarê hilbijartî yê Rûsyayê Vladîmîr Pûtîn roja Pêncşemê dest bi guftûgoyên sazkirina hukûmeta nû ya Rûsyayê kir. Vladîmîr Pûtîn derbarê wê yekê de li Soçîyê di hevdîtina bi serokkomar Dmîtrîy Medvedev re ragihand. Hevdîtina herdu lîderan li Soçîyê li rezîdansa li ``Krasnaya Polyanayê`` pêk hat.

     Dmîtrîy Medvedev ji ber serkeftina Vladîmîr Pûtîn ya di hilbijartinên serokkomarîyê de ew pîroz kir. Em bi bîr bînin, ku Komîsyona Navendî ya Hilbijartinan encamên fermî yên hilbijatinên roja 4`ê Adarê ragihand. Pûtîn di wan hilbijartinan de 63 selefên dengan wergirt.

     Dmîtrîy Medvedev got, ku ``encamên hilbijartinan eşkere ne û welatîyên me bawerîya xwe bi wê arasteyê tînin, ya ji alîyê dewletê ve tê rêvebirin. Di wan demên dawîyê de me bi hev re bingeha aborîya nû saz kir û ew modernîze kir. Erkên gelek giring yên wek dabînkirina ewlekarîyê, parastina taybetmendîyên bergirîyê û piştgirîkirina têkilîyên bi welatên din re li pêşîya welatê me ne``.

    Vladîmîr Pûtîn ji bo pîrozkirinê spasîya Dmîtrîy Medvedev kir û destnîşan kir, ku di pêşerojê de jî wê bi hev re bixebitin.

    Vladîmîr Pûtîn got, ku ``erka me ya sereke parastina dîyarde û tempoyên baş yên makroaborîyê yên di wan salên dawîyê ne. Me bi hev re erkên sosyal pêk anîn, ku bi rewşa aborîyê ya baş ve dikarin bêne çareserkirin. Îro jî em dest bi guftûgoyên sazkirina hukûmeta nû ya Rûsyayê dikin``.

    Sondxwarina serokkomarê nû wê roja 7`ê Gulanê bête lidarxistin. Heta roja 7`ê Gulanê hukûmeta niha wê karê xwe berdewam bike. Hukûmeta nû jî di dawîya meha Gulanê wê dest bi xebata xwe bike. Ihtimaleke mezin Dmîtrîy Medvedev wê bibe serokwezîrê nû û mimkun e, ku di naveroka hukûmeta niha de hinek guhertinan pêk bîne.